پاکستان دشمنی ایوارڈ----معارف فیچر

بسم اللہ الرحمٰن الرحیم

پاکستان دشمنی ایوارڈ

احمد اویس

سانحہ مشرقی پاکستان کے نتیجے میں بنگلہ دیش کا وجود میں آنا اور اس کے اسباب پر تو خاطر خواہ مواد دستیاب ہے۔ مگر اس بات سے کسی کو انکار نہیں کہ سقوط ڈھاکا کو بھارت، روس اور برطانیہ سمیت دیگر عالمی قوتوں کی مدد کے بغیر سر انجام نہیں دیا جا سکتا تھا۔ شیخ مجیب نے متعدد مرتبہ برملا اعتراف کیا کہ بھارت کی مدد کے بغیر بنگلہ دیش نہیں بن سکتا تھا۔ خود اس وقت کی بھارتی وزیر اعظم اندرا گاندھی نے مئی 1971ء ہی میں مشرقی پاکستان کو بنگلہ دیش قرار دے دیا۔ کچھ عرصہ پہلے بنگلہ دیش کی جنگ آزادی میں خدمات سرانجام دینے والے غیر ملکیوں کے اعزاز میں ایک تقریب سے خطاب کرتے ہوئے وزیراعظم شیخ حسینہ نے تسلیم کیا کہ ہم ان غیر ملکی دوستوں کی عسکری مدد کے بغیر آزادی حاصل نہیں کر سکتے تھے۔

بنگلہ دیش بنانے میں سب سے بڑا بیرونی ہاتھ بلاشبہ بھارت کا ہے اور اس کے اسی کردار ہی کی بدولت، 40 سال گزرنے کے بعد، اس بات کی ضرورت محسوس کی گئی کہ بنگلہ دیش کے دوستوں کو یاد کیا جائے اور انہیں آزادی کی جدوجہد میں کام کرنے پر اعزاز سے نوازا جائے، تو بنگلہ دیش کے سب سے بڑے قومی ایوارڈ کی حق دار بھارت کی یہی سابق وزیراعظم آنجہانی اندرا گاندھی قرار پائیں۔ جی ہاں! وہی اِندرا گاندھی، جنہوں نے مشرقی پاکستان میں پہلے دہشت گرد ’’مکتی باہنی‘‘ اور بعد میں باقاعدہ بھارتی افواج داخل کر کے قتل و غارت گری کا بازار گرم کر دیا تھا۔ اُس وقت پاکستان کو دو لخت کرنے کے لیے جتنی سازشیں وہ کر سکتی تھیں، انہوں نے کیں تاکہ بھارت ماتا کے دو ٹکڑے کرنے کا جو ناقابل معافی ’’جرم‘‘ قائداعظم سے سرزد ہوا تھا، اس کا بدلہ لے لیں۔

بنگلہ دیش میں روزِ اول سے خارجہ پالیسی اور معاشی پروگرام، بھارت کے زیرِ اثر بنتا اور آگے بڑھتا رہا۔ عام بنگالی مسلمان، بھارت کا طفیلی بن کر جینے کا مخالف ہے۔ مذہبِ اسلام سے وابستگی بنگال کی پرانی شناخت ہے۔ اسی بنیاد کو کمزور کرنے کے لیے وہاں مختلف حیلوں بہانوں سے اسلام پسندوں کو دیوار سے لگایا جا رہا ہے۔ حزبِ اختلاف کی سیاسی جماعتوں اور تنظیموں کا وجود حکومت کے لیے ناقابلِ برداشت ہو چکا ہے، جنہیں کچلنے کے لیے وہ بے تاب نظر آتی ہے۔ ان دنوں بنگلہ دیش کے اپوزیشن رہنماؤں کو دی جانے والی سزائوں کو اسی تناظر میں دیکھا جا رہا ہے۔ بھارت نوازی اور پاکستان دشمنی کو مزید فروغ دینے کے لیے، انہوں نے بنگلہ دیش کی ’’جنگ آزادی‘‘ میں حصہ لینے والے بیرون ممالک کے دوستوں کو اکٹھا کرنے کا منصوبہ تیار کیا۔ جس کے لیے پانچ سو سے زائد افراد کی فہرست بنائی گئی ہے۔ اب تک مختلف مراحل میں یہ اعزاز 277؍ افراد اور انجمنوں کو دیا گیا ہے، جن میں اکثریت بھارت کے سیاست دانوں اور افواج کے ذمہ داران کی ہے۔ اسی فہرست کے مطابق پہلی مرتبہ 13؍ پاکستانیوں کو بھی ایوارڈ ملا۔

13؍ پاکستانی جن کو بنگلہ دیش ایوارڈ سے نوازا گیا:

1۔ میر غوث بخش بزنجو (سیاست دان)

2۔ احمد سلیم (کارکن انسانی حقوق)

3۔ طاہرہ مظہر علی خان (کارکن انسانی حقوق)

4۔ ظفر ملک (وکیل)

5۔ پروفیسر وارث میر (استاد و صحافی)

6۔ ملک غلام جیلانی (سیاست دان)

7۔ فیض احمد فیض (صحافی)

8۔ حبیب جالب (شاعر)

9۔ ڈاکٹر اقبال احمد (دانشور)

10۔ انور پیرزادہ (سندھی شاعرو صحافی)

11۔ قاضی فیض عیسیٰ (سیاست دان)

12۔ بیگم نسیم اختر (سیاست دان)

13۔ شمیم اشرف (فلم ساز اور سیاست دان)

] نامزد ایوارڈ یافتگان کے ایوارڈ، ان کی طرف سے جن لوگوں نے وصول کیے ان میں: میر غوث بخش بزنجو کا ایوارڈ اُن کے صاحبزادے میر حاصل بزنجو، پروفیسر وارث میر کا اُن کے صاحبزادے حامد میر، ملک غلام جیلانی کا اُن کی صاحبزادی عاصمہ جہانگیر، فیض احمد فیض کا اُن کی صاحبزادی سلیمہ ہاشمی، حبیب جالب کا اُن کی بیٹی طاہرہ جالب نے وصول کیا۔ [

(بحوالہ: روزنامہ ’’اسٹار‘‘ ڈھاکا، بنگلہ دیش۔ 25 مارچ 2013ء)

ایک عام محب وطن پاکستانی کے لیے یہ بڑے دکھ کی بات ہے کہ وہ ایوارڈ جو بھارت کے جرنیلوں کو پاکستان کے مشرقی بازو پر حملہ و قبضہ کرنے پر اظہارِ تشکر کے لیے دیا جا رہا ہو، وہ کسی پاکستانی کو بھی ملے، اور وہ لے لے۔ لیکن اس دنیا میں المیے تو روز روز جنم لیتے ہیں۔ چنانچہ ہمارے چند پاکستانی نہ جانے کیا سوچ کر بڑی خوشی خوشی یہ ایوارڈ وصول کر آئے۔ اسی تقریب میں افواجِ پاکستان سے ہتھیار ڈلوانے والے بھارتی جنرل جگجیت سنگھ اروڑا کے لیے بھی یہی اعزاز رکھا گیا تھا۔ پاکستان میں چند روز بعد بننے والی ایک نگران صوبائی وزیر صاحبہ نے تو وہیں کھڑے کھڑے، پاکستان کی باقاعدہ طور پر بنگلہ دیش سے معافی مانگنے کا مطالبہ کرکے تقریب کی انتظامیہ کو باور کروادیا کہ ان کا ایوارڈ دینا رائیگاں نہیں گیا۔

بنگلہ دیش کی 1971ء کے سانحہ کی وجہ سے قومی شناخت گومگو کی حالت میں ہے۔ ایک طرف وہ قائداعظم کے ساتھیوں، مولوی فضل الحق اور حسین شہید سہروردی کو اپنا ہیرو قرار دیتے ہیں، جنہوں نے انگریزوں اور ہندوئوں کے جبر سے بنگالیوں کو آزادی دلائی تھی اور دوسری طرف اندرا گاندھی اور جنرل اروڑا بھی ان کے عظیم قومی ہیرو ہیں، جنہوں نے قائداعظم کے پاکستان کو توڑنے میں اپنا حصہ ڈالا تھا۔ اسی ذہنی کیفیت کی وجہ سے موجودہ بنگلہ دیشی وزیراعظم نے اپنا دورۂ اسلام آباد عین آخری لمحات میں منسوخ کر دیا اور شرط رکھ دی کہ پہلے پاکستان بنگالیوں سے معافی مانگے۔ حالانکہ خود ان کے والد شیخ مجیب الرحمن نے کبھی اس قسم کا غیر منطقی مطالبہ نہیں کیا تھا اور نہ ہی انہوں نے ذوالفقار علی بھٹو کی دعوت پر اپنا دورہ منسوخ کیا تھا۔

اسی طرح جن پروفیسر صاحب کو بنگلہ دیشی جنگ آزادی میں معاونت پر ایوارڈ دیا گیا ہے وہ اُس وفد میں شامل تھے جو 1971ء میں حالات کی صحیح تصویر دیکھنے اور اپنے جذبات سے بنگالی بھائیوں کو آگاہ کرنے کے لیے عین عسکری آپریشن کے دوران مشرقی پاکستان کا دورہ کرنے گئے تھے۔ 1971ء کے اسی وفد میں شامل طلبہ کے منتخب قائدین نے سقوط ڈھاکا کے بعد ’’بنگلہ دیش نامنظور تحریک‘‘ چلائی تھی۔ یہ تحریک وطنِ عزیز میں چلنے والی سیاسی تحریکوں میں بلاشبہ اپنا تاریخی مقام رکھتی ہے۔ 1972ء اور 1973ء میں ملک کے تمام تعلیمی ادارے ’’بنگلہ دیش نامنظور‘‘ کے نعروں سے گونج رہے تھے۔ نوجوانوں کے لبوں پر یہی نعرہ تھا۔ اس تحریک کے مؤثر ہونے میں کیا شک ہو سکتا ہے کہ خود ذوالفقار علی بھٹو (اُس وقت کے صدر پاکستان، بعد میں وزیراعظم) نے بھی کہا کہ اگر آپ کوبنگلہ دیش نامنظور ہے تو مجھے بھی بنگلہ دیش نا منظور ہے۔ تو بنگلہ دیشی وزیراعظم صاحبہ اسی وفد کے دیگر ارکان کو کس قسم کے ایوارڈ سے نوازنے کا ارادہ رکھتی ہیں؟

اپنے ملک میں اپنے ہی شہریوں پر اپنی فوج کے ذریعے سے قابو پانا کوئی دانش مندی نہیں۔ لیکن حیرت ہے ان لوگوں پر کہ جو پاکستانی افواج کے بنگلہ دیش سے معافی مانگنے پر اصرار کرتے ہیں، مگر انہیں بلوچستان، سوات اور قبائلی علاقہ جات میں آپریشن کے ضرر رساں نقصانات نظر نہیں آتے۔ اسی طرح انہیں انصاف اور انسانی حقوق کا علم بردار ہونے پر فخر ہوتا ہے لیکن انہیں بنگلہ دیشی حکومت کی جانب سے 1971ء کے واقعات کی یک رخی تصویر کشی پر کوئی اعتراض نہیں ہوتا۔ نہ ہی انہیں شیخ حسینہ کی انتقامی کارروائیوں اور حزب اختلاف کی آواز کچلنے پر کوئی خلش محسوس ہوتی ہے۔ بنگلہ دیش میں نام نہاد جنگی جرائم کے مقدمات میں انصاف کے بنیادی تقاضوں کی پامالی پر بھی پاکستان کے یہ نام نہاد حقوقِ انسانی کے چیمپئن خاموش ہیں۔ حالانکہ اس سارے عمل کی مذمت دنیا کے بیشتر ممالک، بشمول اقوام متحدہ بھی کر چکے ہیں۔ اِن بدنامِ زمانہ خصوصی عدالتوں کی کارروائیاں اتنی زیادہ غیر منصفانہ اور جانب دارانہ ہیں کہ کوئی بھی انصاف پسند انسان ان کی تائید نہیں کرتا، نہ کر سکتا ہے۔ مگر اس ظالم بنگلہ دیشی حکومت سے ایوارڈ لینے میں ہمارے ’’پاکستانی‘‘ روشن خیالوں کو کوئی عار نہیں ہوتی۔

24 مارچ 2013ء کو، جب ڈھاکا میں 13؍ پاکستانیوں کو بھی، پاکستان کو دولخت کرنے والوں کے اعزاز میں منعقدہ ایک خصوصی تقریب میں ایوارڈ سے نوازا جارہا تھا، اس سے ٹھیک 73 سال پہلے 1940ء میں لاہور کے منٹو پارک (موجودہ مینار پاکستان پارک) میں شیربنگال مولوی فضل الحق کی قرار داد پاکستان منظور ہوئی تھی۔ ایسے میں کچھ لوگوں کا یہ کہنا معقول لگتا ہے کہ قائداعظم کا دو قومی نظریہ ایک مرتبہ پھر خلیج بنگال میں غرق ہو گیا اور اِن ’’ایوارڈ یافتہ‘‘ پاکستانیوں کے تعاون سے غرق ہوا۔

(یہ تحریر پندرہ روزہ معارف فیچر کراچی کی  یکم مئی 2013ء  کی اشاعت میں شائع ہو چکی ہے۔      http://irak.pk/2013/may-1st-2013/1533-pakistan-enmity-awards.html )

" پاکستان کے وفادار، بنگلہ دیش کے غدار " (saach.tv)

بسم اللہ الرحمٰن الرحیم

" پاکستان کے وفادار، بنگلہ دیش کے غدار "

احمد اویس

بالآخر متنازعہ  انٹرنیشنل کرائمز ٹریبونل بنگلہ دیش نے اپنے قیام کے بعد پہلے مجرم کا تعین کرتے ہوئے مولانا ابوالکلام آزاد کو سزائے موت سنا دی ہے۔ یہ خصوصی عدالت  عوامی لیگ کے انتخابی منشور کا اہم حصہ تھی جسے انھوں نے اقتدار میں آ کر 2010 میں  قائم کیاتھا ۔ وزیر اعظم  شیخ حسینہ اور ان کی ٹیم کا موقف یہ ہے کہ  1971 کی جنگ آزادی میں بیرونی حملہ آوروں  کے ہمراہ جنہوں نے اپنے دیس کے لوگوں کو قتل کیا یا افواج پاکستان کے 9 ماہ تک جاری رہنے والے آپریشن میں ان کی معاونت کی  ان کو قرار واقعی سزا دی جانی چاہیے۔ یہ انصاف کے منتظر ان تیس لاکھ لوگوں کے خون کا قرض ہے جو پاکستان سے آزادی کی جنگ میں مارے گئے تھے۔

اپوزیشن لیڈر اور سابق وزیر اعظم خالدہ ضیاء اس عدالت کی حیثیت کو متنازعہ کہتی ہیں ۔ جماعت اسلامی بنگلہ دیش کا نقطہ نظر یہ ہے کہ محض سیاسی انتقام کے تحت مخالفین کے خلاف مقدمات بنائے جا رہے ہیں۔ جو الزامات لگائے جا رہے ہیں وہ سب جھوٹے ہیں اور ان کا حقیقت سے کوئی تعلق نہیں ۔ خود اقوام متحدہ اس عدالت کو تسلیم کرنے سے انکاری ہے۔ ہیومن رائٹس کی تنظیمیں جو پہلے اس طرح کی تحقیقات کرانے کے حق میں تھیں اب اس میں خرابیوں کی نشاندہی کر رہی ہیں۔ امریکا سمیت دیگر ممالک بھی اس کے طریقہ کار پر اپنے تحفظات کا اظہار کر چکے ہیں ۔ ترکی کے صدر عبد اللہ گل نے تو باقاعدہ  طور پر بنگلہ دیشی حکومت کو خط لکھا اور تمام مقدمات ختم کرنے پر زور دیا۔

اس سب  عالمی دباؤ کے باوجود حکومت نے تمام کاروائی کو اپنے انجام تک  پہنچانے کا عزم ظاہر کیا ہے۔عوامی لیگ بھارت کی حامی جماعت سمجھی جاتی ہے اور اس نے بھارت سے تعلقات کو ایک نیا رخ دیا ہے۔ خاص کر بنگلہ دیشی حکومت کو توقع  ہے کہ بھارت ، بنگلہ دیش میں اپنی براہ راست سرمایہ کاری میں مزید اضافہ کرے گا اور اسے 9 بلین ڈالرز تک لے جانے کے منصوبے پائپ لائین میں ہیں۔  اس تناظر میں یہ سارا معاملہ بھارت نوازی کے علاوہ کچھ اور نہیں لگتا۔

کیا واقعی جماعت اسلامی بنگلہ دیش کی صف اول کی قیادت سمیت بنگلہ دیش نیشنلسٹ پارٹی کے 2 رہنماؤں پر لگنے والے الزامات درست ہیں؟ اور اگر یہ صحیح ہیں تو  ان لوگوں کو اپنا آزادانہ دفاع کرنے سے کیوں روکا جا رہا ہے۔ ابھی اسی مولانا ابوالکلام آزاد کے مقدمہ میں بھی حکومت کی طرف سے جو وکیل صفائی مقرر کیا گیا تھا اس پر بھی وہاں کے لوگوں کو تحفظات تھے۔ اور جس عجلت میں مقدمہ کی  یہ ساری کاروائی مکمل  کی گئی ہے اس سے شکوک و شبہات میں مزید اضافہ ہو گیا ہے۔ خاص کر خصوصی عدالت کے چیف جسٹس نظام الحق کے پچھلے ماہ دسمبر والے  سکینڈل،  جس میں انہیں عدالتی کاروائی کے متعلق  معلومات کو بیرون ملک بھیجنے کی ای میلز اور سکائپ ریکارڈنگ منظر عام پر آئی تھی اور اس کے نتیجہ میں انہیں مستعفی بھی ہونا پڑا، نے اس پر بہت سے سوالات اٹھا دیے ہیں۔ جنہیں کلی طور پر نظر انداز کرنا بنگلہ دیشی حکومت کے بس میں نہیں۔

1971 کی جنگ جسے بنگلہ دیشی عوام نے پاکستان سے نجات حاصل کرنے کے لیے لڑا تھا اور بھارتی فوج کی مدد کے ساتھ اسے جیت بھی لیا تھا اور اسی جنگ کے نتیجہ میں بنگلہ دیش کا قیام عمل میں آیا۔ اس جنگ کے بارے میں ایک پاکستانی اور بنگلہ دیشی کی رائے مختلف ہو سکتی ہے۔  لیکن 40 سال پہلے کے مقدمات کو کھولنا جب نہ تو کوئی گواہ پیش کیا جا سکتا ہے اور نہ ہی انصاف کے تقاضے پورے کیے جا سکتے ہیں محض پاکستان کے خلاف تعصب کے علاوہ کچھ نہیں۔  جن اپوزیشن رہنماؤں پر الزامات لگے ہیں وہ 40 سال تک اسی ملک میں موجود رہے۔ ملکی ترقی اور سیاست میں بخوبی اپنا کردار ادا کرتے رہے ہیں۔ان سےکبھی ملک کے خلاف کوئی قدم اٹھانے کا ثبوت نہیں ملا۔ خالدہ ضیاء کے دور میں وہ حکومت کے سب سے اہم اتحادی اور وزارتوں پر فائز لوگ تھے۔ جماعت اسلامی کو وہاں کی سب سے بڑی مذہبی سیاسی جماعت ہونے کا اعزاز بھی حاصل ہے۔ اس طرح کے بھونڈے الزامات  جو دراصل پاک فوج کے خلاف جاتے ہیں ،عوام کےمنتخب نمائندوں کو پابند سلاسل کرنا کوئی دانش مندی  نہیں ہے۔ حکومت کو چاہئے کہ وہ انصاف کے تقاضوں کو پورا کرے اور   تمام فریقوں کی رضا مندی سے اس طرح کی کوئی کاروائی کرے۔

This is an exclusive piece for saach.tv